Arkitekti i njohur kosovar Gëzim Paçarizi do të jetë Kurator i Pavijonit të Republikës së Kosovës në Ekspozitën e Arkitekturës në Bienalen e Venedikut. Emërimi i Paçarizi është bërë nga Sekretari i Përgjithshëm i Ministrisë së Kulturës, Rinisë dhe Sportit (MKRS), Veton Firizi, bazuar në vendimin e mëhershëm të ministrit Memli Krasniqi për pjesëmarrjen e Kosovës në Bienalen e Venedikut në Ekspozitën e Arkitekturës. “Kuratori ka për detyrë ta ideojë, zhvillojë dhe implementojë konceptin e ekspozitës. Kuratori duhet të ketë gatishmëri që të punojë për së afërmi me Komisionarin për ta zbatuar konceptin në ekspozitë dhe është autori i idesë dhe konceptit të ekspozitës”, është thënë në njoftimin e lëshuar nga MKRS-ja. Ndryshe ditë me parë Ron Arad, një nga arkitektet më të njohur në botë, është emëruar Këshilltar Special i Pavijonit të Kosovës në Ekspozitën e Arkitekturës në Bienalen e Venedikut, e cila do të mbahet këtë vit. Vendimin për emërimin e tij e ka marrë ministri i Kulturës, Rinisë dhe Sportit, Memli Krasniqi. Shpenzimet për realizimin e ekspozitës do t’i mbulojë Ministria e Kulturës, Rinisë dhe Sportit, duke përfshirë edhe koordinimin e donacioneve të mundshme. MKRS po ashtu është edhe komisionere e Pavijonit. Kjo është hera e tretë që Kosova merr pjesë në Bienalen e Venedikut, dhe hera e dytë në Ekspozitën e Arkitekturës. Gëzim Paçarizi ka studiuar në Prishtinë dhe Gjenevë për Arkitekturë. Ai ka disa vjet që punon në Zvicër në fushën e arkitekturës e po ashtu edhe në Kosovë. Ka marrë pjesë në shumë ekspozita ndërkombëtare të arkitekturës dhe konferenca të ndryshme.

Gjithashtu ne Eskluzive